மோட்டரோலா மொபைல் போன் தொழிலை லெனோவாவுக்கு விற்க கூகுள் ஒப்புதல்

கூகுள் தனது மொபைல் தொழில்நுட்ப கம்பெனியான மோட்டரோலாவை லெனோவாவிடம் 2.9 பில்லியன் டாலருக்கு விற்க முடிவு செய்து இரு நிறுவனங்களுக்கிடேயே ஒப்பந்தம் கையெழுத்தாகியுள்ளதாக கூறப்படுகிறது.

நேற்று வெளியான இத்தகவல் மூலம் கூகுளுக்கு இருந்த நிதி தொடர்பான தலைவலி முடிவுக்கு வந்துள்ளதாக கூறப்படுகிறது. 2012ல் 12.4 பில்லியன் டாலர் கொடுத்து கூகுள் வாங்கிய மோட்டரோலா கம்பெனியின் வர்த்தகம் குறுகிய காலத்திலேயே 2 பில்லியன் டாலர் அளவுக்கு மோசமாக குறைந்தது குறிப்பிடத்தக்கது.

ஏறத்தாழ 20000 பேர் வேலை செய்த கம்பெனியில் தற்போது 3800 பேர் மட்டுமே பணிபுரிந்து வருவதாக கூறப்படுகிறது. ஆனாலும் மோட்டரோலாவின் மொபைல் காப்புரிமையை அது தன்னகத்தே நிறுத்திக்கொண்டுள்ளது. இந்த காப்புரிமையை பயன்படுத்தி ஆண்டிராய்ட் மென்பொருளையும், டேப்லட் கம்ப்யூட்டர்களையும் உருவாக்க முடியும். இதை மனதில் வைத்தே 15 ஆண்டுகளாக வளைதள பிரிவில் முத்திரை பதித்து வரும் கூகுள், மோட்டரோலாவை லெனோவாவிற்கு விற்க முடிவு செய்ததாக கூறப்படுகிறது.

புதுவையில் காங்கிரசார் சாலை மறியல்–கடையடைப்பு

புதுவையில் மத்திய மந்திரி நாரயாணசாமி வீட்டில் கிடந்த பைப் வெடிகுண்டை போலீசார் கைப்பற்றினார்கள்.இந்த சம்பவம் பற்றி அறிந்ததும் சட்டசபை எதிர்கட்சி தலைவர் வைத்திலிங்கம், மாநில காங்கிரஸ் தலைவர் ஏ.வி.சுப்பிரமணியன் மற்றும் காங்கிரஸ் எம்.எல்.ஏ.க்கள், முன்னாள் அமைச்சர்கள், முன்னாள் எம்.எல்.ஏ.க்கள், காங்கிரஸ் நிர்வாகிகள் மற்றும் தொண்டர்கள் ஏராளமானோர் மத்திய மந்திரி நாராயணசாமி வீட்டு முன்பு திரண்டனர்.

பின்னர் அவர்கள் அங்கிருந்து ஊர்வலமாக அண்ணாசிலைக்கு வந்தனர். மத்திய மந்திரி நாராயணசாமி வீட்டு முன்பு பைப் வெடிகுண்டு வைக்கப்பட்டதை கண்டித்து அவர்கள் அண்ணா சிலையை சுற்றி 4 ரோட்டிலும் அமர்ந்து சாலை மறியல் போராட்டத்தில் ஈடுபட்டனர்.

இதனையொட்டி அண்ணா சாலை மற்றும் புஸ்சி வீதியில் கடைகள் அடைக்கப்பட்டன. இது பற்றி தகவல் அறிந்ததும் போலீஸ் சூப்பிரண்டு பிரவீன்குமார் திரிபாதி சம்பவ இடத்துக்கு விரைந்து வந்து சாலை மறியலில் ஈடுபட்ட சட்டசபை எதிர்கட்சி தலைவர் வைத்திலிங்கம் மற்றும் காங்கிரசாரிடம் பேச்சுவார்த்தை நடத்தினர். வெடிகுண்டு வைத்தவர்களை உடனடியாக கண்டறிந்து அவர்கள் மீது நடவடிக்கை எடுக்கப்படும் என்று உறுதி அளித்தார்.

இதனை ஏற்று காங்கிரசார் மறியல் போராட்டத்தை கைவிட்டு கலைந்து சென்றனர். போராட்டத்தை காங்கிரசார் கைவிட்டாலும் தொடர்ந்து மத்திய மந்திரி நாரயாணசாமி வீட்டு முன்பு குழுமி இருந்தனர்.

மாநிலங்களவை தேர்தல்: தமிழகத்தில் 6 எம்.பி.க்கள் போட்டியின்றி தேர்வாகிறார்கள்

டெல்லி மேல்-சபைக்கு தமிழ்நாட்டில் இருந்து எம்.பி.க்களாக இருக்கும் 18 பேரில் 6 பேரின் பதவிக்காலம் வரும் ஏப்ரல் மாதம் 2–ந்தேதியுடன் முடிகிறது. இதையடுத்து காலியாக உள்ள 6 இடங்களுக்கு வரும் 7–ந்தேதி தேர்தல் நடத்தப்படும் என்று தலைமை தேர்தல் கமிஷன் அறிவித்தது.

அ.தி.மு.க. சார்பில் சசிகலா புஷ்பா, விஜிலா சத்தியானந்த், முத்துக்கருப்பன், செல்வராஜ் ஆகியோர் வேட்பாளர்களாக அறிவிக்கப்பட்டனர். அ.தி.மு.க. கூட்டணியில் இடம் பெற்றுள்ள மார்க்சிஸ்ட் கம்யூனிஸ்டு சார்பில் டி.கே. ரெங்கராஜன் நிறுத்தப்பட்டுள்ளார்.

மேல்– சபை தேர்தலுக்கான வேட்பு மனுத்தாக்கல் கடந்த 21–ந்தேதி தொடங்கியது. முதல் நாளே தி.மு.க. வேட்பாளர் திருச்சி சிவா வேட்புமனு தாக்கல் செய்தார்.

அ.தி.மு.க. வேட்பாளர்கள் சசிகலா புஷ்பா, விஜிலா சத்தியானந்த், எஸ்.முத்துக்கருப்பன், கே.செல்வராஜ் ஆகிய 4 பேரும் நேற்று மனுதாக்கல் செய்தனர். மார்க்சிஸ்ட் கம்யூனிஸ்டு வேட்பாளர் ரங்கராஜனும் நேற்று தனது மனுவை தாக்கல் செய்தார்.

வேட்புமனு தாக்கல் செய்வதற்கு கடைசி நாளான கால அவகாசம் இன்று பிற்பகல் 3 மணியுடன் முடிந்தது.

மேல்– சபை தேர்தலில் காங்கிரஸ் மற்றும் தே.மு.தி.க. தரப்பில் வேட்பாளர்கள் நிறுத்தப்படலாம் என்று தகவல்கள் வெளியானது. ஆனால் அவர்கள் வேட்புமனு தாக்கல் செய்யவில்லை. சுயேச்சை வேட்பாளர்கள் இரண்டு பேர் மனுதாக்கல் செய்துள்ளனர். அவர்கள் மனு பரிசீலனை போது அது நிராகரிக்கப்படும்.

இதனால் மேல்– சபை தேர்தலில் போட்டி இருக்காது. தற்போது மனு செய்துள்ள 4 அ.தி.மு.க. வேட்பாளர்கள் ஒரு தி.மு.க. வேட்பாளர், ஒரு மார்க்சிஸ்ட் வேட்பாளர் ஆகிய 6 பேரும் போட்டியின்றி ஏகமனதாக தேர்ந்து எடுக்கப்பட்டு விடுவார்கள்.

கூகுள்- சாம்சங் நிறுவனங்களுக்கிடையே உலகளாவிய காப்புரிமை ஒப்பந்தம்

தகவல் தொழில்நுட்பத்துறையின் பெருநிறுவனங்களான சாம்சங்கும், கூகுளும் அறிவுசார் தொழில்நுட்ப சொத்துகளின் மீது இரு நிறுவனங்களுக்கிடையேயான ஒத்துழைப்பை வளர்க்கும்பொருட்டும், செலவுமிகுந்த சட்ட மோதல்களின் அபாயத்தைக் குறைக்கும் வகையிலும் ஒரு ஒப்பந்தத்தை மேற்கொண்டுள்ளன.

இந்த ஒப்பந்தமானது அடுத்த பத்தாண்டுகளில் பெறவிருக்கும் காப்புரிமைகள் மீதும், தற்போது நடைமுறையில் உள்ள காப்புரிமைகள் மீதும் செல்லுபடியாகும் என்று சாம்சங் நிறுவனம் இன்று குறிப்பிட்டுள்ளது. ஆனால் இந்த ஒப்பந்தம் குறித்த நிதி விதிமுறைகள் அறிக்கைகளில் வெளியிடப்படவில்லை.

இரு நிறுவனங்களுக்கிடையேயான இந்த உடன்பாடு சட்டரீதியான மோதல்களைக் குறைத்து கண்டுபிடிப்புகள் மீதான கவனத்தை அதிகரிக்கும் என்று கூகுள் நிறுவனத்தின் துணை பொது வழக்கறிஞரான ஆலன் லோ தெரிவித்தார். ஆராய்ச்சி மற்றும் வளர்ச்சித் துறைகளில் இரு நிறுவனங்களுக்கும் இடையே ஆழமான ஒத்துழைப்பிற்கு இந்த ஒப்பந்தம் வழி வகுக்கின்றது என்று சாம்சங் நிறுவனம் குறிப்பிட்டுள்ளது.

ஸ்மார்ட் போன்கள் மற்றும் தொலைக்காட்சிகள் தயாரிப்பில் ஏற்கனவே இந்த இரு நிறுவனங்களும் இணைந்து செயல்பட்டு வருகின்றன. மொபைல் போன்கள், கம்ப்யூட்டர்கள் போன்றவற்றிற்கான மெமரி சிப்ஸ் போன்ற முக்கியமான தொழில்நுட்பக் கூறுகளை தயாரிப்பதில் சாம்சங் முன்னணியில் உள்ளது. அதுபோல் இணையதளத் தேடலில் முக்கியப் பங்கு வகிக்கும் கூகுள் வர்த்தகரீதியாக அதிக அளவில் உபயோகப்படுத்தப்படும் ஆண்டிராய்ட் போன்கள் தயாரிப்பில் முன்னணியில் உள்ளது.

இந்த புதிய ஒப்பந்த அறிவிப்பின்மூலம் கூகுள் நிறுவனத்தின் முக்கிய திட்டங்களில் ஹார்டுவேர் தொழில்நுட்ப பங்குதாரராக சாம்சங் நிறுவனம் இணைவதற்கான வாய்ப்புகள் அதிகம் உள்ளதாக நொமுரா நிதி முதலீட்டின் ஆய்வாளரான சுங் சங் வான் தெரிவித்துள்ளார். தங்களுடைய காப்புரிமம் கொண்ட தொழில்நுட்ப நிறுவன உத்திகளை பிற நிறுவனங்கள் பின்பற்றும்போது பொதுவாக வழக்குகள் மூலமே இத்தகைய பிரச்சினைகள் சந்திக்கப்படும். ஆனால் பல வழக்குகள் இதுபோல் நீதிமன்றத்திற்கு வெளியே குறுக்கு உரிமம் குறித்த உடன்பாடுகள் பெறப்படுவதோடு முடிந்துவிடும் என்று தகவல்கள் தெரிவிக்கின்றன.

128 ஆண்டுகால தயாரிப்பு ரகசியத்தை பெட்டகத்தில் வைத்து பாதுகாக்கும் 'கோக்கோ கோலா' நிறுவனம்

நெடுநாள் நண்பர்கள் ஒருவரையொருவர் சந்தித்துக் கொள்ளும் போது வழக்கமான 'வணக்கம்' மற்றும் நல விசாரிப்புக்கு பிறகு உபசாரம் என்று வரும் போது, உலகம் முழுவதும் ஒரே சம்பிரதாயம் தான் கடைபிடிக்கப்படுகிறது.'என்ன சாப்பிடுறீங்க... டீயா?, காபியா?, 'கோக்கா'? என்ற சம்பிரதாய வார்த்தை இல்லாமல் எந்த சந்திப்பும் முழுமை பெறுவதில்லை. அமெரிக்கா மற்றும் மேற்கத்திய நாடுகளில் வசிக்கும் கோடிக்கணக்கான மக்களுக்கு அன்றாடம் 1 லிட்டர் 'கோக்' ஆவது குடிக்காவிட்டால் மண்டை வெடித்து விடுவது போல் ஆகிவிடும்.

'கோக்' என்ற அந்த இரண்டெழுத்து மந்திரத்துக்கு கட்டுண்டு கிடக்கும் கோடானுகோடி மக்களில் பலருக்கு உலக பிரசித்தி பெற்ற 'கோக்கோ கோலா'வின் நதி மூலம் (வாழ்க்கை வரலாறு) தெரிந்திருக்க நியாயமில்லை.அவர்களுக்கு உதவிடும் வகையில் இந்த தகவலை பறிமாறியுள்ளோம். வாசித்து அறிந்து கொள்ளும் நீங்களும் இந்த தகவலை இதர நண்பர்களுடன் பகிர்ந்து உதவுவீர்கள் என நம்புகிறோம்.

18ம் நூற்றாண்டின் பிற்பகுதியில் தலைவலிக்காக நிவாரணம் தேடி மருந்துக் கடைகளுக்கு வந்தவர்களுக்கு கடைக்காரர்கள் ஒரு ரகசிய பொருளை தண்ணீரில் கரைத்து தந்தனர். இதை சாப்பிட்ட பலருக்கு உடனடியாக தலைவலி பறந்தே போனது. அந்த 'ரகசிய மருந்து' தான் நாளடைவில் பாட்டில்களில் அடைக்கப்பட்டு 'கோக்கோ கோலா' என்ற வணிகப் பெயருடன் உலக நாடுகளில் உள்ள விற்பனை கூடங்களில் பிரபலமடைந்தது.

அமெரிக்காவின் அட்லாண்டா நகரில் கோக்கோ கோலாவின் தலைமை அலுவலகம் உள்ளது. இங்குள்ள ஒரு பாதுகாப்பு பெட்டகத்தில் உச்சகட்ட பாதுகாப்புடன் 127 ஆண்டுகால பழமை வாய்ந்த கோக்கோ கோலாவின் தயாரிப்பு ரகசியம் வைக்கப்பட்டுள்ளது.

சில மாதங்களுக்கு முன்னர், இந்த தயாரிப்பு ரகசியம் தொடர்பான குறிப்புகள் தன்னிடம் இருப்பதாகவும், அவற்றை வெளியிடாமல் இருக்க ஒர் பெருந்தொகையை கோக்கோ கோலா நிறுவனம் தனக்கு தர வேண்டும் என்றும் ஒருவர் மிரட்டல் விடுத்தது நினைவிருக்கலாம். 1886ம் ஆண்டு தொழில் முறையாக தொடங்கப்பட்ட அட்லாண்டாவில் உள்ள கோக்கோ கோலா நிறுவனம் 1910ம் ஆண்டு ஏற்பட்ட ஒரு தீ விபத்தில் பெரும் பாதிப்பை சந்தித்தது.

மெல்ல, மெல்ல அந்த பாதிப்பில் இருந்து விடுபட்டு குளிர்பானங்களின் தயாரிப்பில் முடிசூடா மன்னனாக கோக்கோ கோலா இன்றளவும் திகழ்கிறது. உலகளாவிய அளவில் சிறந்த வர்த்தக அடையாளப் பெயராக 2011ம் ஆண்டு கோக்கோ கோலா தேர்வு செய்யப்பட்டது. கடந்த 128 ஆண்டுகளாக கோக்கோ கோலாவின் தயாரிப்பு ரகசியம் எங்கோ ஓரிடத்தில் பத்திரமாக வைக்கப்பட்டுள்ளது என்பது பலரும் அறிந்த சங்கதிதான்.

ஆனால், அட்லாண்டாவில் உள்ள தொழிற்சாலையில் உச்சகட்ட லேசர் விளக்குகளின் பாதுகாப்பில் அந்த ரகசியம் பாதுகாக்கப்பட்டு வருகிறது என்பது சிலருக்கு தெரிந்திருக்க வாய்ப்பில்லை.கடந்த ஆண்டு முதல் நாள்தோறும் ஆயிரக்கணக்கான கோக்கோ கோலா பிரியர்கள் அந்த பாதுகாப்பு பெட்டகத்தை காணும் போதே களைப்பு நீங்கி, களிப்படைந்து வருகின்றனர்.

1977-ம் ஆண்டு இந்தியாவை ஆட்சி செய்த மத்திய அரசு, 'வெளிநாட்டு நிறுவனமான கோக்கோ கோலா, அதன் தயாரிப்பு ரகசியத்தை ஒப்படைத்து விட்டு, (அப்போது கடுமையாக அமல்படுத்தப்பட்ட) அன்னிய செலாவனி ஒழுங்குமுறை சட்டத்தின்படி, இந்தியாவில் செய்துள்ள முதலீடுகளை எல்லாம் திரும்பப் பெற்றுக் கொண்டு உடனடியாக நாட்டை விட்டு வெளியேற வேண்டும் என உத்தரவிட்டது.

ஆனால், தயாரிப்பு ரகசியத்தை ஒப்படைக்க மறுத்த கோக்கோ கோலா நிறுவனம் இந்தியாவில் இருந்த தொழிற்சாலைகளை வேறொரு குளிர்பான தயாரிப்பு நிறுவனத்துக்கு விற்றுவிட்டு நாட்டை விட்டு வெளியேறியது.அதன் பின்னர், மத்தியில் ஆட்சி மாறிய போது காட்சியும் மாறியது. இதனையடுத்து, பொருளாதார தாராளமையம் என்ற கொள்கையுடன் இந்திய தொழில் துறையில் உச்சவரம்பு ஏதுமின்றி அன்னிய முதலீட்டை அனுமதிப்பது என்று மத்திய அரசு முடிவு செய்தது.

இதனையடுத்து, கடந்த 1993-ம் ஆண்டு இந்திய குளிர்பான தயாரிப்பு துறையில் மீண்டும் காலடி பதித்த கோக்கோ கோலா சுமார் 20 ஆண்டுகளாக விற்பனையில் 'சக்கைப்போடு' போட்டு இந்திய குளிர்பான சந்தையில் தனி இடத்தை பிடித்துள்ளது.

போராட்டம் நடத்தும் இடத்திலேயே அரசு கோப்புகளை பரிசீலித்து முடிவுகள் எடுக்கப்படும்: கெஜ்ரிவால்

போதை மருந்து விற்பனையில் தொடர்புள்ளதாக கூறப்படும் உகாண்டா நாட்டு பெண்ணை உள்ளடக்கிய கும்பல் மீது நடவடிக்கை எடுக்குமாறும், அவர்களை கைது செய்யும்படியும் டெல்லி சட்ட அமைச்சர் சோம்நாத் பாரதி உத்தரவிட்டார். இதனை அமல்படுத்த காவல்துறை அதிகாரிகள் மறுத்துவிட்டனர்.

இதையடுத்து, கடமையைச் செய்யாத காவல்துறை அதிகாரிகள் மீது நடவடிக்கை எடுக்க வலியுறுத்தி இன்று போராட்டத்தை தொடங்கியுள்ள முதல்வர் கெஜ்ரிவால் 10 நாட்கள் போராட்டம் நடைபெறும் என்று அறிவித்துள்ளார். அதேசமயம் தனது அலுவலக பணிகளும் பாதிக்கப்படாமல் பார்த்துக்கொள்ளப்படும் என்றும் அவர் தெரிவித்துள்ளார்.

போராட்டம் நடக்கும் இடத்திலேயே அனைத்து கோப்புகளையும் வரவழைத்து பரிசீலித்து முடிவெடுக்க உள்ளதாக அவர் கூறினார்.

இலங்கை சிறையில் இருந்த மண்டபம் மீனவர்கள் 10 பேர் விடுதலை

மீனவர்களின் பிரச்சினை தொடர்பாக இந்தியா-இலங்கை மீனவ பிரதிநிதிகள் விரைவில் பேச்சுவார்த்தை நடத்த உள்ள நிலையில், இரு நாட்டு சிறைகளிலும் உள்ள மீனவர்கள் பரஸ்பரம் விடுதலை செய்யப்பட்டு வருகின்றனர்.

அந்த வகையில், இலங்கை சிறையில் இருந்த காரைக்கால், புதுக்கோட்டை மீனவர்கள் 52 பேர் விடுதலை செய்யப்பட்டு, இந்திய கடலோரக் காவல் படையினரிடம் ஒப்படைக்கப்பட்டனர். அவர்கள் நேற்று பத்திரமாக சொந்த ஊர் திரும்பினர். மேலும், பல மீனவர்கள் இலங்கை கடற்படையினரால் கைது செய்யப்பட்டு சிறையில் உள்ளனர்.

இந்நிலையில், கடந்த ஜனவரி 2-ம் தேதி இலங்கை கடற்படையினரால் கைது செய்யப்பட்ட மண்டபம் பகுதியைச் சேர்ந்த 10 மீனவர்களின் நீதிமன்றக் காவல் முடிவடைந்ததையடுத்து அவர்கள் இன்று மன்னார் நீதிமன்றத்தில் ஆஜர்படுத்தப்பட்டனர். இன்று இவர்கள் விடுவிக்கப்படுவார்கள் என எதிர்பார்த்திருந்த நிலையில் அவர்களின் நீதிமன்றக் காவலை ஜனவரி 31-ம் தேதி வரை நீட்டிப்பு செய்து நீதிமன்றம் உத்தரவிட்டது.

பிற்பகல் மீண்டும் விசாரணைக்கு வந்தபோது அவர்கள் 10 பேரையும் விடுதலை செய்வதாக நீதிபதி அறிவித்தார். இதையடுத்து அவர்கள் இந்திய கடலோர காவல் படையினரிடம் ஒப்படைக்கப்பட்டு, விரைவில் நாடு திரும்புவார்கள் என எதிர்பார்க்கப்படுகிறது.

மூன்று அமெரிக்க ராணுவ ராக்கெட்டுகளை ரகசியமாக ஏவியது நாசா

அமெரிக்க ராணுவத்தின் ரகசிய பயணங்களை உள்ளடக்கிய மூன்று ராக்கெட்டுகளை நாசா இன்று விண்ணில் ஏவியது. டெர்ரியர்-ஆனியன் என்ற இந்த ராக்கெட்டுகளை 20 விநாடி வித்தியாசத்தில், அதிகாலை 4.09 மணிக்கு தொடர்ச்சியாக விண்ணில் செலுத்தி நாசா சாதனை படைத்துள்ளது.

நாசா அதிகாரிகளிடம் ராக்கெட் எப்போது ஏவப்பட்டது என்ற தகவலை வெளியிட வேண்டாம் என அமெரிக்க பாதுகாப்பு துறை கூறியது குறிப்பிடத்தக்கது.

இரு அடுக்கு சுழற்சி கொண்ட இந்த ராக்கெட்டுகள் 1315 கிலோ எடை கொண்டதாகவும், 91 கிலோ எடையுள்ள பொருளை 200 கி.மீ உயரத்திற்கு சுமக்கும் சக்தியும், 363 கிலோ எடையுள்ள பொருளை(வெடிகுண்டு) 80 கி.மீ உயரத்திற்கு சுமக்கும் சக்தியும் கொண்டுள்ளதாக கூறப்படுகிறது.

பால் பவுடருக்குள் மறைத்து 6 1/2 கிலோ தங்கத்தை சார்ஜாவில் இருந்து கடத்த முயன்ற இருவர் கைது

சார்ஜாவில் இருந்து 55 தங்க பிஸ்கட்களை கடத்த முயன்ற 2 பேரை சுங்கத்துறையினர் நேற்று கைது செய்துள்ளனர். சார்ஜாவில் இருந்து வங்காளதேச தலைநகர் டாக்காவுக்கு நேற்று புறப்பட தயாராக் இருந்த விமானத்தில் ஏறுவதற்காக பயணிகள் பலர் சுங்கப் பரிசோதனை பகுதி அருகே வரிசையில் காத்திருந்தனர்.

அவர்களில் இருவர் கொண்டு சென்ற டப்பாக்களை பார்த்த அதிகாரிகளுக்கு சந்தேகம் ஏற்பட்டது. அவற்றில் என்ன இருக்கிறது? என்று அதிகாரிகள் கேட்டபோது, இருவரும் முரண்பாடான பதில்களை கூறினர். தனியான பகுதிக்கு அவர்களை அழைத்து சென்று, டப்பாக்களை உடைத்து பரிசோதித்தபோது, பால் பவுடருக்குள் தங்க பிஸ்கட்களை மறைத்து வைத்திருந்தது கண்டுபிடிக்கப்பட்டது. 6.41 கிலோ கிராம் எடையுள்ள 55 தங்க பிஸ்கட்களையும் பறிமுதல் செய்த அதிகாரிகள் அவர்கள் இருவரையும் போலீசாரிடம் ஒப்படைத்தனர்.

சார்ஜாவில் இருந்து கள்ளத்தனமாக தங்கத்தை மறைத்து, கடத்த முயன்றது ஏன்? என போலீசார் விசாரித்தபோது, 'அந்த 55 தங்க பிஸ்கட்களையும் வங்காளதேசத்துக்கு கொண்டு சென்று விற்று விடலாம். அதன் மூலம் ஒரு பெரிய தொகை லாபமாக கிடைக்கும் என்று தீர்மானித்தோம்.

வெளிப்படையாக எடுத்து சென்றால் எங்கள் நாட்டு சுங்கத்துறையினர் அந்த தங்கத்துக்கு இறக்குமதி வரியை வசூலிப்பார்கள். வரியை கட்டிய பிறகு அதிக லாபம் சம்பாதிக்க முடியாது. அதனால் தான், தங்க பிஸ்கட்களை பால் பவுடருக்குள் மறைத்து கொண்டு செல்ல முயன்றோம்’ என்று பிடிபட்ட நபர்கள் வாக்குமூலம் அளித்தனர்.

சார்ஜாவின் விலை நிலவரப்படி பிடிபட்ட தங்கத்தின் மதிப்பு சுமார் 10 லட்சம் திர்ஹம் என தெரிய வந்துள்ளது.இதேபோல், 699 கிராம் எடையுள்ள 12 தங்க கட்டிகளை இந்தியாவுக்கு கடத்தி செல்ல முயன்ற ஒருவரையும் சார்ஜா போலீசார் நேற்று முன்தினம்  கைது செய்தது நினைவிருக்கலாம்.

எங்கள் நாட்டின் சட்டங்களை மீறிய வகையில் இது போன்று கள்ளத்தனமாக இங்கிருந்து பொருட்களை கடத்த முயற்சிப்பவர்கள் மீது தயவு தாட்சண்யமின்றி கடும் நடவடிக்கை எடுக்கப்படும் என சார்ஜா போலீசார் மீண்டும் எச்சரித்துள்ளனர்.

தேவயானி இன்று இந்தியா திரும்புகிறார்: அமெரிக்கா சட்ட பாதுகாப்பு வழங்கியது

அமெரிக்காவின் நியூயார்க்கில் இந்திய துணை தூதராக பணியாற்றிய தேவயானி கோப்ரகடே விசா மோசடி மற்றும் பெண் ஊழியரின் சம்பள மோசடி புகார்களுக்காக அமெரிக்க போலீசாரால் கைது செய்யப்பட்டார். இதற்கு இந்தியா கடும் எதிர்ப்பு தெரிவித்தது.அதற்கு பதிலடி கொடுக்கும் வகையில் இந்தியாவில் பணியாற்றும் அமெரிக்க தூதர்களின் சலுகைகள் ரத்து செய்யப்பட்டன. இதனால் இருநாடுகளுக்கும் இடையேயான உறவில் விரிசல் ஏற்பட்டது.

இதற்கிடையே தேவயானி மீதான வழக்கு விசாரணை வருகிற 13–ந்தேதி நியூயார்க் கோர்ட்டில் நடைபெறுவதாக இருந்தது. இந்த விசாரணையை தள்ளி வைக்க வேண்டும் என்று நியூயார்க் கோர்ட்டில் தேவயானி சார்பில் மனு தாக்கல் செய்யப்பட்டது. இந்த கோரிக்கையை ஏற்க மறுத்து மனுவை நீதிபதி தள்ளுபடி செய்து விட்டார்.இதற்கிடையே, இந்த வழக்கில் ‘திடீர்’ திருப்பம் ஏற்பட்டுள்ளது. அதாவது, இந்தியாவின் கோரிக்கையை ஏற்று தேவயானிக்கு இந்த வழக்கில் இருந்து அமெரிக்கா முழு தூதரக விதிவிலக்கு அளித்து சட்ட பாதுகாப்பு வழங்கியுள்ளது.

இது தொடர்பான கடிதத்தை அமெரிக்க அட்டர்னி ஜெனரல் பிரீத் பாராரா மாவட்ட நீதிபதி ஷிரா ஷெயின்ட் லினுக்கு அனுப்பிய கடிதத்தில் குறிப்பிட்டுள்ளார். அதை தொடர்ந்து பெண் ஊழியர் சங்கீதா ரிச்சர்ட்டுக்கு விசா வாங்க மோசடி செய்தல் மற்றும் அதற்காக பொய் தகவல்கள் கொடுத்தல் என்ற 2 குற்றச்சாட்டுகள் தேவயானி மீது பதிவு செய்யப்பட்டன. மேலும் அவர் அமெரிக்காவில் இருந்து இந்தியா செல்ல அனுமதியும் வழங்கப்பட்டது.
இது குறித்து மத்திய வெளியுறவு அமைச்சகம் வெளியிட்டுள்ள அறிக்கையில் தேவயானிக்கு அமெரிக்கா முழு தூதரக விதிவிலக்கு அளித்து சட்ட பாதுகாப்பு வழங்கியுள்ளதால் ஜி1 விசா கிடைத்துள்ளது.

எனவே, அவர் இன்று இந்தியா திரும்புகிறார் என்று கூறப்பட்டுள்ளது. இதற்கிடையே இந்தியா புறப்படும் முன் நியூயார்க் விமான நிலையத்தில் தேவயானி நிருபர்களுக்கு பேட்டி அளித்தார். அப்போது அவர் கூறியதாவது:–
என் மீது சுமத்தப்பட்டுள்ள குற்றச்சாட்டு பொய்யானது. மற்றும் ஆதாரமற்றது. நான் நிரபராதி என்பதை கோர்ட்டில் நிருபிப்பேன் என்றார்.

மேலும், அவர் கூறும் போது எனது துறை மந்திரிக்கு நன்றி தெரிவிக்கிறேன். இந்த இக்கட்டான சூழ்நிலையில் என் பக்கம் நின்ற நாட்டு மக்கள், அரசியல் வாதிகள் மற்றும் சக தூதரக அதிகாரிகள் மற்றும் ஊழியர்களுக்கு எனது மனமார்ந்த நன்றியை தெரிவித்து கொள்கிறேன் என்றார்.தேவயானி இந்தியா திரும்பினாலும் அவர்மீதான வழக்கு விசாரணை அமெரிக்காவில் தொடர்ந்து நடைபெறும் என்று அறிவிக்கப்பட்டுள்ளது.

அமெரிக்காவை மிரட்டும் பனிச் சுழல்காற்று: விமான போக்குவரத்து ரத்து

கடந்த சில நாட்களாக வட அமெரிக்காவை துருவ பனி சுழல்காற்று தாக்கி வருகிறது. இதனால் அங்கு கடும் பனி மழை கொட்டுகிறது.இதனால் அமெரிக்காவின் பல பகுதிகள் பனி மூடிக்கிடக்கின்றன. வீட்டை விட்டு பொது மக்கள் யாரும் வெளியே வரமுடியவில்லை. இதனால் மக்களின் அன்றாட வாழ்க்கை பாதிக்கப்பட்டுள்ளது.

அமெரிக்காவின் வட கிழக்கு பகுதி கடுமையாக பாதிக்கப்பட்டுள்ளது. இங்கு 2 அடி உயரத்துக்கு பனி மூடிக்கிடக்கிறது. இந்த வார இறுதி வரை 3,700 விமானங்களின் போக்குவரத்து ரத்து செய்யப்பட்டுள்ளது.பள்ளிகள், கல்லூரிகள் மற்றும் அலுவலகங்களுக்கு விடுமுறை விடப்பட்டுள்ளது. வடக்கு மற்றும் மத்திய அமெரிக்காவில் மைனஸ் 51 டிகிரி அளவுக்கு குளிர் வாட்டுகிறது.

சிகாகோ, இல்லினாய்ஸ், மின்னாபாலிஸ் உள்ளிட்ட நகரங்களிலும் கடும் பனிப்பொழிவு ஏற்பட்டுள்ளது. அங்கும் பள்ளிகள், அலுவலகங்கள் திறக்கப் படவில்லை. அமெரிக்காவில் பனிப்புயலுக்கு இதுவரை 16 பேர் பலியாகி உள்ளனர்.

கனடாவிலும் கடும் பனி சுழல்காற்று வீசுகிறது. இதனால் அங்கும் பனி கொட்டுகிறது. அங்கு மைனஸ் 20 டிகிரி செல்சியஸ் அளவுக்கு தட்ப வெப்ப நிலை உள்ளது.தலைநகர் டொரண்டோவில் மைனஸ் 38 டிகிரி செல்சியஸ் ஆக உள்ளது. இதனால் அங்கும், அதை சுற்றியுள்ள பகுதிகளிலும் பொது மக்கள் வாழ்க்கை பாதிக்கப்பட்டுள்ளது. பள்ளிகள் திறக்கப்படவில்லை.

தெலுங்கானா விவகாரம்: ஆந்திர சட்டசபையில் கடும் அமளி

ஆந்திர சட்டசபையில் தெலுங்கானா மசோதா மீதான விவாதம் இன்று தொடங்குவதாக இருந்தது. சபை கூடியதும் ஆந்திர மாநில பிரிவினை குறித்து கொண்டு வந்த ஒத்திவைப்பு தீர்மானத்தை எடுத்துக் கொள்ள வேண்டும் என எதிர்க்கட்சி உறுப்பினர்கள் வற்புறுத்தினர்.

சபாநாயகர் இதற்கு அனுமதி மறுத்தார். உடனே எதிர்க்கட்சியினர் கடும் எதிர்ப்பு தெரிவித்தனர். தெலுங்குதேசம், ஒஸ்.எஸ்.ஆர். காங்கிரஸ் கட்சி எம். எல்.ஏ.க்கள் சபாநாயகர் நாதெல்லா மனோகரனை முற்றுகையிட்டு ஒருங்கிணைந்த ஆந்திராவை வலியுறுத்தி கோஷங்களை எழுப்பினார்கள். இதனால் சபையில் கடும் அமளி ஏற்பட்டது.

இதையடுத்து சபையை 30 நிமிடம் சபா நாயகர் ஒத்திவைத்தார்.

காற்றழுத்த நிலை வலுப்பெற்றது: கடலோர தென் மாவட்டங்களில் மழை பெய்ய வாய்ப்பு

வங்கக் கடலில் தென் கிழக்கு பகுதியில் குறைந்த காற்றழுத்த தாழ்வு நிலை உருவானது.

அது தென்கிழக்கு அதனையொட்டியுள்ள தென்மேற்கு வங்கக் கடலில் 24 மணி நேரத்திற்கு தமிழக கடலோர மாவட்டங்கள் மற்றும் புதுச்சேரியில் ஓரிரு இடங்களில் காற்றழுத்த தாழ்வு பகுதியாக வலுவடைந்து நிலை கொண்டுள்ளது.

இதன் காரணமாக மழைக்கு வாய்ப்பு உள்ளது. கடலோர தென் மாவட்டங்களில் ஒரு சில இடங்களில் மழை பெய்யக்கூடும்.
சென்னையில் வானம் மேக மூட்டத்துடன் காணப்படும். நகரில் ஓரிரு இடங்களில் மழை பெய்யும்.காற்றழுத்த தாழ்வு பகுதியால் தமிழகத்திற்கு மழை கிடைக்குமா? என்று விவசாயிகள் எதிர்பார்க்கிறார்கள்.